10-04-2009 15:16:39 Источник: Тульский край. Документы и материалы.
ИЗ ГРАМОТЫ ВЕЛИКОГО КНЯЗЯ МОСКОВСКОГО ИВАНА ВАСИЛЬЕВИЧА ВЕЛИКОМУ КНЯЗЮ РЯЗАНСКОМУ ИВАНУ ВАСИЛЬЕВИЧУ О ГРАНИЦАХ ВЛАДЕНИЙ И СОВМЕСТНЫХ ДЕЙСТВИЯХ ПРОТИВ ВНЕШНИХ ВРАГОВ.
9 июня 1483 г.
Божьею милостью и пречистые его матери, и по благословеныо отца нашего Геронтья, митрополита въсеа Руси, на сем на всем, брате молодшии, кн. в. Иван Васильевич, целуи ко мне крестъ к своему брату стареишему, к в. кн. Ивану Васильевичю, и к моему сыну, къ своему брату стареишему, к в. кн. Ивану, и к нашему брату молодшему, ко кн. Андрею Васильевичю, и к нашему брату молодшему, ко князю к Борису Васильевичю. и к меншему нашему брату, ко князю к Михаилу Андреевичю, и къ его сыну, ко князю к Василью.
Имети ти меня, великого князя, себе братом стареишим. И моего сына, великого князя, имети ти его себе братом стареишим. А брата нашего молодшего, кн. Андрея, имети ти его себе братом. А брата нашего молодшево, кн. Бориса, и меншево нашего брата, кн. Михаила, и сына его, кн. Василья, имети ти себе братьею молодшею. А добра ти нам хотети везде, во всем, где бы ни было. А что ти слышев о [нашем] добре или о лисе от хрестианина, или от литвина, или от иноверця, то ти нам поведати въ правду, без примышленья. А быти ти со мною, С великим княземъ, и с моим сыномъ, с великим князем, везде заодин, [без хитро]сти. А нам, великим княземъ, с тобою быти везде заодин и печаловатися тобою и твоею отчиною без хитрости. А где будешь хотя послал на наше лихо, тамо ти отослати.
А с королем с Казимиром и с великим князем литовским, или кто иныи будет князь велики на Литовъскои земле, не канчивати ти, ни съсылатися с ним на наше лихо, ни вь его ти ся имя съ своею землею не дати. А от насъ ти к литовъскому никоторыми делы не отступити. А быти ти с нами, с великими князми, на литовского везде заодин...
А межи нас роздел земле ниже Коломны по реце по Оце по Цну, от усть Цны вверхъ по Цне; что на Московскои стороне, то к Москве, а что на Рязанскои стороне, то к Рязани.
А что Володимерьское порубежье, а то по тому, как было при наших прадедех и дедех, при в. кн. Иване Даниловиче, и при в. кн. Семене Ивановиче, и при в. кн. Иване Ивановиче, и при в. кн. Дмитрее Ивановиче, и при в. кн. Василье Дмитриевиче, и при нашем отце, при в. кн. Василье Васильевиче, и при твоем прадеде, при в. кн. Иване Ярославиче, и при в. кн. Иване Ивановиче, и при в. кн. Иване Александровиче, и при в. кн. Олге Ивановиче, и при твоем прадеде, при в. кн. Федоре Олговиче, и при твоем деде, при в. кн. Иване Федоровиче, и при твоем отце, при в. кн. Василье Ивановиче.
А что купля отца нашего, в. кн. Василья Васильевича, за рекою за Окою, Тешилов, и Венев, и Растовець, и иная места, и тем нашим землям със твоею землею рубеж от Оки, с усть Смeдвы въверхъ по Смедве до усть Песоченки, а Песоченкою до верховья Песоченского, а от верховья Песоченки через лес прямо к Осетру, к усть Кудесне, а Кудесною въверхъ до верховьа, а от верховиа Кудесны прямо к верхъ Табалом, а по Табалом на низ в Дон. И что перешло за тот рубеж тое купли отца нашего, в. кн. Васильевы, на твою сторону, и нам, великим князем, в то не въступатися, ни под[ъ]искивати, ни нашим детем под твоими детми никоторою хитростью. А что перешло твоеи земли, великого князя, Рязанские за тот рубеж на нашу сторону, и в тося тебе у нас не вступати, ни под[ъ]искивати под нами, под великими князми, ни под нашими детми, ни твоим детем никоторою хитростью.
А что за Доном твое, в. кн. Ивано[во], Романцево с уездом и что к нему потягло, и нам, великим князем, в то не въступатися. А тебе не въступатися в нашу отчину, в Елеч и во вся Елецская места. А Меча нам ведати вопче...
Печатается по тексту. опубл, в сб. “Духовные и договорные грамоты великих и удельных князей XIV - ХVI вв.”. изд. АН СССР. М.-Л., 1950 г., стр. 283-285.
Статья добавлена в пятницу 10 апреля 2009 года, 15:16:39